25 ans de succès

La Plataforma per la Lenga nasquèt en 1993 del Collectiu l'Esbarzer, un grop de joves engatjats al malhum associatiu de la Vila de Gràcia de Barcelona que volián melhorar la situacion del catalan. Los integrants d'aquel Collectiu venián sustot del mond coral, de l'excursionisme e de la cultura populara e tradicionala.

A la debuta de las annadas nonanta del sègle XX, la dissolucion de la Crida a la Solidaritat aviá daissat orfanèl un espaci de reivindicacion que caliá servar. Aital, la Plataforma per la Lenga recampava l'experiéncia de l'activisme civic de la Crida e modernizariá lo discors a favor del catalan a partir de las valors principalas d'aquela: l'eficiéncia, l'eficàcia, lo pragmatisme e l'obtencion de resultats tangibles.

De la primièra epòca de reünions als istorics Lluïsos de Gràcia, l'organizacion anèt en creissent e s'estructurèt amb de comissions de trabalh e nuclis territorials, tot en establissent sinergias amb d'autras associacions de l'encastre lingüistic. En mai, divèrses artistas an afavorit l'organizacion tot en i ofrissent las siás creacions pictoricas.

Amb l'acreissement de la Plataforma per la Lenga, aquesta s'es anada consolidant coma l'entitat de referéncia de la societat civila en questions de lenga, tot en bastissent un espaci pròpri e un discors diferenciat, lo de l'ONG del catalan. En mai, tre la debuta del sègle XXI, l'entitat dispausa d'un Conselh Consultatiu de caracter assessor e una revista corporativa, La Corbella.

Doas decadas après la siá naissença, amb de milièrs de sòcis, nombroses volontaris e una estructura tecnica que dona responsa als projèctes entamenats, la Plataforma per la Lenga contunha de trabalhar per far del catalan la lenga comuna e de coesion sociala.